Categories: Health aur Care

Pairo Ki Badbu Dur Karne Ke 10 Gharelu Tarike in Urdu

Jab bhi aap kahi jate hai to kya apko apne jute aur moje nikalne me sharm aati hai, kyonki aisa karne se pairo se bahut badbu aati hai jise aap khud bhi sahan nahi kar sakte. Yah yah sahi hai to aap bromhidrosis naak ki bimari se grasit ho sakte hai jisme paseene ki glands bahut jyada paseena nikalti hai aur badbu paida karti hai.

Ha, iske karan apko kafi sharmnaak anubhav ho sakta hai.

Hamare pairo me badbu kyo ati hai?

Amtaur par pairo me badbu tab ati hai jab apke pair paseena nikalte hai aur jute aur moje pahne rahne ke karan yah sukh nahi pata. Hamari skin par naturally bacteria maujud hote hai jinka khana paseena aur dead skin cells hote hai, aur vah badbudar pakhana nikalte hai. Inhi bacteria ke karan paseene me badbu aati hai.

  • Mausam chahe koi bhi ho, kisi bhi vyakti ke pairo me badbu aa sakti hai. Lekin yah problem jyadatar pregnant khawateeno aur bachho me jyada hoti hai kyonki unki body me hormonal changes hone ke karan paseena jyada nikalta hai.
  • Koi bhi vyakti jo dinbhar jute pahne rahta hai ya bahut jyada depression me rahta hai, usko paseena jyada ata hai.
  • Kuch jute aur moje paseene ke secretion ko badha dete hai aur usko sukhne nahi dete. Yah moist environment bacteria ki growth ko tej kar deta hai. Yah bacteria paseene me maujud leucine naak ke substance ko isovaleric acid me badal dete hai. Isi acid me badbu aati hai. Bacteria ki kism ke adhar par badbu alag-alag ho sakti hai.
  • Yadi aap hyperhidrosis naak ki bimari se grasit hai to apko paseena jyada ayega aur badbu bhi jyada hogi.
  • Body ki saaf-safai na rakhne ke karan bhi pairo me badbu aa sakti hai. Jo log regularly apne pairo, moje aur juto ko saaf nahi karte vo badbu paida karne wale bacteria ki growth ko badhane ke liye sahi environment dete hai.

Aise kai gharelu ilaj hai jinko apnakar aap pairo ki badbu se chhutkara paa sakte hai. Lekin iske liye apko inhe regularly apnana hoga. Inme se jyadatar ilaj hafte bhar me hi pairo ki badbu ko puri tarah se thik kar sakte hai.

Pairo ki badbu dur karne wale 10 sabse kargar ilaj

1. Sone se pahle pairo me baking soda lagaye (Use Baking Soda Before Going to Bed)

Sodium bicarbonate jise baking soda bhi kaha jata hai, pairo ki badbu dur karne me kafi faydemand hota hai. Yah pasine ke pH ko kam karke bacteria ko kam karta hai.

  • Roj sone se pahle ek pani ke tub me baking soda milakar apne pairo ko 15-20 minute ke liye dubokar rakhe. Aisa lagatar ek hafte tak karne se pairo ki badbu puri tarah se dur ho jati hai.
  • Apne dono mojo aur juto ko pahanne se pahle baking soda ke chhinte mare.

2. Lavender ka tel (lavender oil)

Lavender oil kafi khushbudar hota hai jo pairo ko mahkane me help karta hai aur yah bacteria ko marta bhi hai. Sath hi, isme antioxidant aur antifungal properties hoti hai jo pairo ki badbu ka ilaj karti hai.

  • Garm pani me kuch bunde lavender essential oil ki dale.
  • Ab is pani me apne pairo ko 15-20 minute ke liye dubokar rakhe.
  • Is ilaj ko kuch dino ke liye roj din me 2 baar kare.

3. Sendha namak (epsom salt)

Sendha namak magnesium sulfate se bana hota hai jiska istemal ghar, kheti, beauty products, medicines aadi kai jagah hota hai. Sendha namak microbial infection ko kam karke pairo ki badbu ko dur karta hai. Sendha namak se nahane se body me khujli bhi kam hoti hai.

  • Garm pani se bhare ek chhote tum me 3 chammach sendha namak mila de.
  • Ab isme apne pairo ko 10-15 minute ke liye dubokar rakhe. Achhe result pane ke liye is ilaj ko raat ko sone se pahle kare.

4. Black tea

Black tea me tannic acid hoti hai jo badbu paida karne wale bacteria ko khatm karne me help karti hai. Yah pairo me maujud rom chhidro ko band bhi karti hai jisse paseena kam aata hai. Pairo ki badbu dur karne ke liye doctors aksar black tea ki advice dete hai.

  • Teen cup pani me do black tea ke bags ko ubale. Ubaalne ke baad isme thoda thanda pani daal de jisse temperature kam ho jaye.
  • Fir pani me apne pairo ko 15-20 minue ke liye dubokar rakhe.
  • Is ilaj ko lagatar ek hafte tak roj do bar kare.

5. Sirka (vinegar)

Vinegar bhi pairo ki badbu ko dur karne me helpful hota hai, kyonki yah pairo me aisa acidic environment bana deta hai jisme bacteria jeevit nahi rah pate. Aap kisi bhi type ka vinegar, khastaur se apple cider vinegar (seb ka sirka) ka istemal kar sakte hai.

  • 8 cup garm pani me dedh cup vinegar milaye.
  • Ab isme apne pairo ko 10-15 minute ke liye dubokar rakhe.
  • Fir apne pairo ko sabun se saaf kar le, jisse vinegar ki gandh nikal jaye.

6. Devdar ka tel (cedarwood oil)

Devdar ke tel ko nature se nikaale jane wale pahle essential oils me se ek mana jata hai.

Sath hi, isko aroma therapy me bhi kafi istemal kiya jata hai, aur isme antibacterial, antifungal aur antiseptic properties hoti hai. Yah sab properties devdar ke tel ko pairo ki badbu se ladne me kafi faydemand banate hai.

Aap devdar ke tel ko nariyal ke tel ke sath milakar istemal kar sakte hai. Nariyal ke tel ke bhi kai health benefits hote hai. Isme lauric acid hoti hai jo bacteria se ladti hai. Sath hi, isme skin ko javan banaye rakhne wali properties bhi hoti hai. Isko kai beauty products me bhi istemal kiya jata hai, kyonki yah tel ke muqable jyada der tak skin par tika rahta hai.

  • 5 bund achhi quality ke devdar ke tel ko do chammach nariyal ke tel me mila le.
  • Ab ise dhire-dhire apne pairo par lagakar massage kare. Ab kuch der ke liye pairo ko ek jagah rakh kar baith jaye jisse vah tel ko achhe se sokh le.
  • Is ilaj ko lagatar ek hafte ke liye roj kare.

7. Boric acid

Boric acid bhi pairo ki badbu dur karne me kafi faydemand hoti hai. Yah badbu paida karne wale bacteria ko khatm karti hai.

  • Pairo ki badbu dur karne ke liye thode se boric acid powder ko apne paseene yukt pairo par chhidak le.
  • Ya fir, do cup pani me dedh-dedh cup boric acid aur vinegar mila le. Ab ise apne juto ke andar spray kare.

8. Sugar scrub

Sugar scrub me sweetener ke alava kai aur faydemand properties bhi hoti hai. Sugar dead cells ko nikalne me help karti hai. Pairo ke dead cells aur calluses nikaalne se bhi pairo ki badbu ko kam karne me help milti hai, kyonki yah bhi badbu paida karne me helpful hote hai. Iska regularly istemal karne se pairo ko saaf rakhne me help milti hai aur naye calluses banne se bhi rukte hai. Aap neeche diye gaye ilajo ko apnakar ek powerful homemade sugar scrub bana sakte hai.

  • 6 chammach sugar, 2 chammach saaf pani aur 10 chammach isopropyl (91% ya jyada) ko apas me mila le.
  • Ab is mixture ko apne pairo me lagakar 5-10 minute ke liye scrub kare. Aisa karne se bacteria aur dead cells nikal jayenge. Iske baad pairo ko dho le.
  • Is ilaj ko hafte me kam se kam teen baar kare.

Note – Achhe result pane ke liye is ilaj ko karne se pahle apne pairo ko garm pani me dubokar rakhe.

9. Talcum powder

Pairo ki badbu ko talcum powder ya baby powder ke istemal se bhi dur kiya ja sakta hai. Is powder me natural khushbu paai jati hai aur yah paseene ko sokhkar pairo ko sukha rakhne me help karte hai.

Roj subah shaam apne pairo me talcum powder ya baby powder lagaye. Aap ise apne juto me chhidak bhi sakte hai.

10. Adrak (ginger)

Adrak bhi badbudar pairo ke liye kafi kargar ilaj hota hai, kyonki yah bacteria ki growth ko rokta hai aur toxic substances ko hatane me help karta hai.

  • Ek adrak ko kutkar paste bana le. Ab ise ek cup pani me dalkar 10-15 minute ke liye ubale.
  • Iske bad is pani ko chhan le aur raat ko sone se pahle apne pairo par lagaye.
  • Is ilaj ko lagatar do hafto ke liye roj kare.

Upar diye gaye ilaj jyadatar pairo ki badbu ko dur kar dete hai, lekin ise banaye rakhne ke liye pako apne pairo, moje aur juto ko regularly saaf rakhna bhi jaruri hai.

Pairo ko badbu se dur rakhne ke upay

Thik se saaf-safai aur pairo ki dekhbhal karke aap badbu se bache rah sakte hai.

  • Roj apne pairo ko antiseptic soap lagakar saaf kare aur brush se scrub karke dhul aur dead cells nikale. Dhyan rakhe, pairo ko dhone ke baad inhe achhe se sukha le, khastaur se ungliyo aur anguthe ke beech ke hisse ko.
  • Apne nakhuno ko regularly kate.
  • Roj nahane se pahle apne pairo ko 10 minute ke liye pani me dubokar rakhe aur nahate time inhe achhe se saaf kare.
  • Apne moje aur juto ko regularly saaf kare aur inhe geela na pahne.
  • Perfect naap ke jute aur moje hi pahne. Sath hi, garmi ke mausam me patle moje pahne.

Yadi upar diye gaye ilajo se bhi apke pairo ki badbu nahi ja rahi hai ya apko hyperhidrosis ki problem hai to doctor se contact kare.

Share