Categories: Health aur Care

Acidity Ke 10 Gharelu Ilaj in Urdu

Acidity ya pet ki gas ki problem pet me digestive acids ke imbalance ke karan hoti hai. Iske normal symptoms hai – pet me dard, pet me gas, jee machalna, khatti dakar ana aur pet me jalan hona. Yah kafi common bimari hai jo kisi bhi umra ke vyakti ko kabhi bhi ho sakti hai.

Acidity hone ke sabse main reason hai – bahut jyada tale bhune aur masaledar khane ko khana, exercise ya physical exercise na karna, irregular khanpan, irregular lifestyle, stress ya depression, bahut jyada sharab peena aadi.

Ghar par hi kuch easy nuskho ko apnakar acidity se asani se chhutkara paya ja sakta hai. Jaise sabse pahle khub pani piye jisse pet ki acid beasar ho jaye aur pet se bahar nikal jaye.

Yadi apko acidity baar-bar hoti hai, to roj raat ko sone se pahle aur subah uthte hi ek glass gunguna pani piye. Lekin khana khane ke turant pahle ya turant baad me pani na piye kyonki isse digestion gadbad ho sakta hai.

Aise hi kuch gharelu ilaj hai jinko apnakar pet ki acidity ko ghar par hi thik kiya ja sakta hai. Aise 10 sabse kargar gharelu nuskhe niche diye ja rahe hai –

1. Tulsi ki pattiya

Tulsi ki pattiyo me carminative properties hoti hai jo acidity, pet ki gas aur jee machalne ki problem me turant rahat deti hai.

  • Pet me gadbad feel hote hi turant kuch tulsi ki pattiyo ko chabakar khaye.
  • Ya fir, ek cup pani me 4-5 tulsi ki pattiyo ko dalkar ubale aur fir kuch minutes ke liye thanda hone ke liye rakh de. Ab isme swad ke anusar shahad mila le aur pee le.

2. Dalchini

Dalchini digestive system ki health ke liye kafi faydemand hoti hai. Yah natural antacid ki tarah kaam karti hai aur pet ki gas me shukun dene me help karti hai.

  • Ek cup pani me adha chammach dalchini milaye.
  • Ab is pani ko kuch minutes ke liye ubale.
  • Is dalchini ki chaay ko din me 2 ya 3 baar piye.

Aap dalchini ko salad ya soup me dalkar bhi le sakte hai.

3. Chhachh

Acidity ka ek aur saral gharelu ilaj hai chhachh peena. Isme lactic acid hoti hai jo pet me acids ko beasar kar deti hai.

  • Ek glass chhachh le. Ab isme thode se methi ke beejo ka powder dalkar piye. Acidity ke karan jab bhi pet me dard ho to isko piye.
  • Achhe result pane ke liye chhachh me kali mirch ka powder ya dhaniye ki pattiyo ko dalkar le.

4. Seb ka sirka (apple cider vinegar)

Acidic nature ka hote huye bhi seb ke sirka ka alkalizing effect hota hai. Isliye yah bhi pet ki acidity ko dur karne me help karta hai.

  • Ek chammach kachhe aur bina chhane seb ke sirka ko ek cup pani me ghole.
  • Ise din me ek ya do baar le. Aap ise khane se pahle bhi le sakte hai.

5. Laung

Laung me carminative effect hota hai jo pet me hydrochloric acid ko badhakar acidity aur pet ki gas ko khatm karne me help karta hai. Apko yah jankar hairani hogi ki pet me acids ki kami karan bhi acidity ho sakti hai.

  • 2-3 laung ko khub chaba-chabakar khaye jisse uska juice apke pet me chala jaye.
  • Ya fir, laung aur elaichi ko ek sath koot le aur khaye. Yah pet me acid ke effect ko kam karegi aur sanso ko tarotaja karke khatti dakaro se rahat degi.

6. Jeera

Jeera bhi acidity ke ilaj me kafi faydemand hota hai kyonki ya pet me acid neutralizer ki tarah kaam karta hai. Sath hi yah digestion ko bhi thik karta hai aur pet dard me rahat pradan karta hai.

  • Do chammach jeeta ko bhunkar pees le aur ek glass pani me milakar pee le. Isko roj khane se pahle piye.
  • Aap jeera ko pani me ubalkar bhi le sakte hai. Ek cup pani me ek chammach jeera dalkar 5-10 minute ke liye ubale. Ab is pani ko chhankar pee le.
  • Ya fir, ek-ek chammach dhaniya ke beejo ka powder, jeera ka powder aur saunf ke powder ko dedh cup pani me ghol le. Ab isme swad anusar sugar daal de aur pee le. Isko khali pet le.

7. Adrak

Adrak me anti-inflammatory properties hoti hai jo acidity ko thik karne me help karti hai. Adrak ka juice, pet ki acids ko kam karne me bhi help karta hai.

  • Pet me gas hone par adrak ke tukdo ko chabakar khaye.
  • Ya fir, adrak ke tukdo ko pani me 10 minute ke liye ubale. Fir pani ko chhankar pee le.
  • Ya fir, roj din me do baar ek-ek chammach adrak ke juice ko piye.

8. Gud

Gud digestion ko thik karne me help karta hai. Sath hi pet me iska alkaline effect hota hai jo acidity ko kam karne me help karta hai.

Roj khana khane ke baad ek chhote se gud ke tukde ko chabakar khaye.

Note – yadi apko diabetes hai to gud ko na khaye.

9. Saunf

Saunf me carminative properties hoti hai jo digestion ko thik karti hai pet ki gas me rahat deti hai.

  • Khana khane ke baad kuch saunf ke beejo ko chabakar khaye.
  • Ya fir, do chammach saund ko ek cup pani me dalkar ubale aur fir pani ko chhankar pee le. Is pani ko din me 2-3 baar le.

10. Thanda dudh

Dudh pet me gastric acids ko stabilize karke acidity me rahat deti hai. Isme calcium hota hai jo pet me bahut jyada acids ko banne se rokta hai.

Isliye jab bhi apko acidity ho to ek glass thande dudh ko piye.

Share